Se ricordelo maestro

Sergio Zanoccoli • Bovolone (VR)

 

Se ricordelo maestro?

Se ricordelo de chele scole elementari?

De chei grombialini neri,

coleti bianchi e fiochi verdi?

De chele face spaenté da chel so sguardo,

da chele so manone e dal so nason?

“Eto fato el compito? Fame vedar”

serio con chela pena rossa

un zero a tuta pagina,

e nel vedar i me oci lustri

el so disegnar, dentro chel tondo,

oci, naso, boca e... le lagreme;

e de chel uno davanti el zero?

Se ricordelo del me soriso?

E del so dir: “Quà no se fà ricreazion

la scola l’è mia n’albergo!”

E de me mama?

“El me butin l’è magro, bisogna chel magna!”

Me par de sentir el  gusto de pan e cafelate

magnà fora de classe, de scondon

e i me compagni par la me siera patìa

a pensar: “i ghe fà le punture!”

“Punture de cafelate”.

Nel cor g’ho i so oci lustri, maestro,

nel strucar le me mane

quando mi ormai grando e istruio

ghe regalaa bon Nadal e bona Pasqua.

Se ricordelo, se ricordelo maestro

de chei ani de penini e macie de inchiostro, de carta assorbente

de quaderni a righe de bela, de tirade de recie,

de gesseti e lavagna, de campanele che sona, de... de...?

Ancò na croce, un tumulo de tera

e ‘na lagrema scapà par el so ricordo...

ma me piase pensar che dal ciel lù, maestro, el me veda

el disegna un zero, i-oci, la boca, la me lagrema

chel meta chel’uno davanti al zero

e mi ghe regalo ancora  el me soriso.