La guera

Classe 3B della scuola Media di Bovolone • Bovolone (VR)

Nonna Elena - Filippo

Durante la seconda guera mondiale s’era apena nata.

Me ricordo che quando ne pasava i aparechi sora la testa coreene tuti nei rifugi che i era nei fosi; in casa no s’erene al sicuro parche’ se i pasava e i vedea la luce impiza i butava le bombe.

Mi s’era picinina ma gavea tanta paura e ‘ndaseene soto scala e pregaene.

Un giorno el “pipo” l’à bombardà una stradina che portaa in paese e noaltri picinini, in leto, semo restè in silenzio par la paura: le schege le vegnea drento dale finestre.

N’altro giorno s’erene in casa; dei tedeschi, su un caro con dei cavai, ie vegnui nela nostra corte; ie ‘nde in casa e ia voluo da magnar; i volea anca el vin ma no ghe n’era mia; alora ghemo dato pan e salado, ma i insistea che i volea del vin; vin no ghe n’era: alora i gà punta la rivoltela contro me nona e ala fine i sa contentà.

Na olta dei tedeschi i sa fermà in tanti par ponsarse e dormir; uno de lori l’à visto in casa me cusineto: el sa meso a pianzar parchè a casa sua el gavea anca lu un fiol cosita picolo.

L’oto setembre, ghe stà l’armistizio: i americani i pasava par le strade coi tedeschi fati prigionieri; noaltri ie saludaene con dei fazoi bianchi e lori ne dava quel che no gaveene.

 

Nonna Ivana - Eleonora

Durante la seconda guera mondiale gavea oto ani.

Me ricordo che in casa mancava el sal, el zucaro e l’olio d’oliva. Mancava anca el pan e el se andasea a tor con la tessera.

Se vivea co’ na gran paura, sopratuto la sera, quando i me genitori i cuerzea le finestre con de le querte parchè no se vedesse neanca na picola luce; na picola luce volea dir na bomba che cascava dal ciel; Pipo lo ciamaene l’aereo che girava de note, el somenava bombe.

Me ricordo con gran paura el primo bombardamento su Isola della Scala: el ciel l’era illuminà come de giorno con i bengala, i radar e el fogo de le bombe che scopiava. No gavene neancora un rifugio e guardavene come uno spettacolo tuta chela luce.

Mi era terorizà de dover andar a dormir in na stala, più che le bombe me fasea paura de note dormir su la paia in mezo a le vache, quando le vache le se moea, le cadene le fasea rumor e mi gavea el cor che batea in gola. Dormene ne la stala dela località “Spin” parchè la me casa la se trovava poco distante dal campo de l’aviazion. Che speso el vegnea bombardà.

Me ricordo na note de luna piena, de chele che na olta se disea che se podea catar na ucia in un paiar.

M’avea apena indormenzà, quando me son sveià con gran fracasso: stava cascando tuti i veri de le me finestre e da na casa vizina a la mia ho sentio urlar: “La bomba, la bomba, aiuto, aiuto!”.

Me papà e me mama in un bati balen, iroià in na querta, i ma portà nel campo dove ghera el nostro rifugio. Ho visto vegner avanti de corsa de le butele con so mama, iera desperè.

Quando me papà le riusio a calmarle le ha contà; ghera cascà na bomba sul teto de la casa, l’avea sfondà el leto dove dormea so mama e con l’anel la bomba la gavea grafià na gamba, l’era cascà su la tola e la savea sprofondà nel pavimento senza scopiar.

Dopo la disperazion le ha scomizià a pregar e a dir: “Le sta un miracolo”. El giorno dopo emo savù che el famoso aereo da cacia che ciamavene Pipo l’avea visto na luce impizà ne la casa e par colpir l’obietivo la scomizià a sganciar bombe dal centro del paese, zinque par esar esati, tute scopiè, ma l’ultima no.

Me ricordo anca che me mama, de matina bonora, l’andasea in bici fin a Verona, con do sportè de tabaco che me papà el catava su nei campi e el le taiava fin con na machina de so invenzion: l’avea trasformà el torcolo dei bigoli in na machina da taiar el tabaco. Arivà a Verona la conosea na signora che, in cambio, la ghe dasea sal, zucaro a calche querta. Con una de ste querte me mama la ma fato un paletò, ma purtropo proprio su la parte davanti ghe scadù el marchio SS, in poche parole gavea un paletò con la firma dei tedeschi, me vegnea da pianzar!

 

Zia Imelda - Stefania

Gavea sete ani quando ghera i ultimi giorni dela seconda guera mondiale.

Se gavea na paura mata dei tedeschi… i portava via de tuto: biciclete, cavai, cari, quel che i catava par scapar dal’ Italia. Dove abitava mi, i tedeschi i avea sequestrà el palazzo e i savea fato la so sede. Quando i bombardava noaltri nasene nel rifugio o senò se metene nei fosi.

In paese se patea la fame. Mentre in campagna se magnava matina, mezogiorno e sera la polenta.

Un giorno me papà l’era in corte e è rivà tri tedeschi, i volea le biciclette, uno el sa avicinà a me papà e inveze i altri du iera indrio. Me papà el ga dito che biciclete no ghe n’era mia (anca se iera nascoste nel fienil). Alora el tedesco l’à tira fora la pistola e el ghe l’à punta ala testa. I altri du tedeschi che iera indrio, ia sentio du spari e pensando che i fuse gli Italiani, ia lassà tuto lì e iè scapè via!!!!!

 

Nonna Rita - Lucia

Gavea disdoto ani ne la seconda guera mondiale.

Nisuni vegnea fora dala porta, tuti i gavea paura e i stasea sconti.

Mi no proava niente, gavea solo paura.

Mi gavea quatro fradei via in guera, ma ghera na lege che disea che i podea star via solo tri par famea, cosita uno le vegnuo de olta.

Me fradel Enrico l’è vegnu zò dai Trachi a piè, n’altro la noà tuto l’Adese e l’ultimo el se scondea nei campi.

Quando iè vegnui de olta tuti, me mama l’a fato costruir un capitel par rengraziar la Madona.

Na olta i tedeschi iè vegnui in casa mia e i ghe restè tri giorni, i volea el vin bon. Noaltri gavene na cantina con dei vezotini de vin bon, ma avene zontà de l’acqua; alora i sa irabià e i na meso el mitra su la tola disendone che o ghe se dasea quel bon o i ne copava tuti. Me papà l’è nà fora parchè altrimenti ci sa sal fasea dala rabia. I me fradei i ga dato el vin che i volea e i l’à piantà lì.

Me ricordo che, quando Hitler l’a streto el pato con Mussolini, lu l’a ordinà che tuti quei che stesea vizin i dovea metar ben le case; cosita Hitler el pensaa che l’Italia l’era un paese meso ben.

Na matina bonora che me nona l’era andà a mesa, ia scominzià a bombardar lì vizin. Mon Signor Pezzo, el prete, l’a dito de star fermi. Dopo un poco ià finio e le bombe iera caschè tute in parte ala ciesa. Da alora ogni tredese maggio a Boolon se fa la Procession par la grazia de la Madonna.

 

Zio Ferruccio - Martina

Durante la seconda guera mondiale g’avea dodes’ani parchè son del trentatrì.

Me ricordo i bosoli dele mitraglie che i cascava dal ciel e noaltri buteleti ndaseine a catarli su par zugar.

Tute le noti pasava el Pipo, l’aparechio tedesco de ronda, a controlar se ghera moimenti de trupe americane par el paese.

Darente la scola ghera el magazin pien zepo de viveri da darghe ai pitochi ma i fascisti, piutosto de sfamar la gente, i e lasava là a smarzir.

La gente l’era zo de corda parchè non ghera né laoro, né magnar e no la savea più come far par mantegner la famea.

Mi e chialtri buteleti serino sempre contenti parchè quando g’aveine calcosa da sbecolar e da zugar serene a posto.

Ma quando vedeine i nostri papà che iera tanto preocupè se rendeine conto de quanto che la ndasea mal.

 

Zio Ferruccio - Martina

Me ricordo che du tedeschi armè i sa fato portar a Opean da me nono e, quando che iè stè là, i ga puntà el fusil e i ga fregà la cavala, el careto e calche scheo par far la ritirata. Cosita a me nono ghe tocà vegner a casa a piè.

Un giorno è passà i aparechi americani par ndar a bombardar su l’Adese parchè i tedeschi i tentaa de far la ritirata atraversando l’Adese con le brentele e i careti.

Ne la me corte, che g’avea na casa grande con la stala e el portego, gh’era tanti morari che i querzea tuto e soto ghera i cari armati tedeschi. Un militar tedesco el sa meso a sparar con un fusil contro i aparechi, el so comandante alora el l’à fermà subito parchè se i americani i se ne incorzea i bombardaa e i radea tuto al suolo.

Du giorni prima che finise la guera è nato me fradelin ale do de note. La matina a le zinque i americani i bombardaa, cosita mi e me sorela emo ciapà uno el butin e uno la pegnata e semo corsi fin al rifugio nel campo. Dala paura ho molà la ramina in mezo al fromento e quando sa calmà un pochetin la situazion son ndà par zercarla ma non son più sta bon de catarla.

 

Nonno Vinco - Mirko

Quando g’avea disnov’ani, i ma ciamà par nar in guera.

Dopo un par de ani son nà con i me compagni in Calabria.

Là ghera la miseria e no magnaine niente.

Par fortuna na dona de bon cor la na imprestà una teia par cosar i gati che cataine in giro.

Quando la dona le vegnua a torse la teia che la nà imprestà, la nà dito: “La teia la sa da bon… sa g’avio coto?”

E noaltri g’avemo risposto: “I gati.”

Alora sta dona la nà regalà la teia parchè non la g’avea più animo da cosar le robe che dopo la magnava ela.

 

Nonna Elsa - Matteo

Mi gavea tredes’ani e quando l’è finia disdoto, me ricordo che g’avea tanta paura dei bombardamenti parchè i aeroplani par andar a bombardar Verona i pasava desora le nostre teste e il primo bombardamento che emo visto l’è stà el quatordese febraio 1941. Questa guera le finia dopo zinque ani, ma mi no g’avaria più creduo.

Quando i vegnea a bombardar Verona (aleati) le bombe le cascava desora le nostre teste. Durante i bombardamenti la gente la se scondea soto le mura del’Arena.

Nela parte destra del’Adese indò el fa na curva ghera una specie de pasagio, al massimo l’acqua la podea arivarte ala cintura. Lì un capitan tedesco chel comandava un ploton de tedeschi giovanisimi (sedese ani masimo), par farli adestrar el ghe disea: “Avanti moarse, atraversè che qua non podì mia negarve”. Inveze el s’avea sbaglià parchè chel lì l’era el punto piasè profondo e anca se l’à visto che no i resalea più, el volea che tuti i entrese in acqua minaciandoli con la rivoltela.

Ma un barcaiol vedendo chei poveri ragazi, el sa avizinà al comandante e el gà dito che  un metro più in sù ghera na specie de sentiero, ma il comandante non la mia scoltà, perciò tuti i ragazi i sa negà.

Me ricordo che finia la guera sera andà sul’argine parchè gavea da tor del late, e vidi tantisimi soldè morti neghè, a panza in zò e dei buteleti che i ghe tirava dei sasi incosto.

Me ricordo anca de pipo, un guastafeste che de note, quando pasaa la gente par strada, i e mitraiava, quindi bisognava esar veloci a sconderse senò el tè fasea l’aconciatura nova.

 

Nonna Mary - Matteo

Durante la seconda guera mondial gavea ventiun ventidù ani.

Me ricordo che ghera i aeroplani che ne pasava desora le teste e i ne butava dele picole bombe. Gavea sempre tanta paura de chel “muso” de pipo che quando el pasava de note, el bombardaa in do ghera anca un minimo segno de vita.

 

Nonno Giovanni - Francesca

Quando ghera la seconda guera mondial g’avea disnove ani.

Mi alora stasea a Sanisol e ghera i altri che bombardava la stazion de Boolon. Me scondea nel’erba e, insieme ai me fradei, ie sentea bombardar. La gente la g’avea un pochetin de paura.

Me ricordo de na signora che l’à domandà a na mantoana, che la vendea el formaio, cosa l’era la paura. Ela la g’à risposto che la paura l’è fata a bareta e ci vol la se le meta.

Mi e i me fradei emo visto el bombardamento de la stazion de Boolon, noialtri g’avene paura e pensaene sempre a scondarse.

Me fradel l’è andà en guera, ma mi no parchè g’avea i piè piati e cosita l’ò scampà, manco mal parchè non saria mia sta bon de farla.

Me ricordo che un giorno me zia Pina l’era nel campo con na zesta de zeole e i aerei iera de sora de ela e gh’è casca un bosolo, che la saria na picola bomba, nel zesto. Le stà bruta anca parchè mi ho visto tuto.

Mi stasea a Sanisol, sula strada e na olta i tedeschi ià meso i so zaini davanti ala porta e iè entrè in casa e i n’à domandà un teìn par scaldarse da magnar. Dopo i n’à dito che i avea meso i zaini coi fusili fora da la porta par far vedar a i altri tedeschi de andar avanti e de non fermarse lì.

Bisnonna Gina - Vittoria

Son nata durante la prima guera mondiale e gavea 35 ani quando gh’è stà la seconda guera mondial. Abitava sula strada con la me fameia in na casa granda. Sicome i bombardava sule strade, semo trasferio in campagna dove serene più al sicuro, dai nostri amici. Dormene afolati in una stanza e certi me fioi i dormea in un fienil.

Se stava mal, se patea la fame, sopratuto in cità dove i magnava anca i gati.

Noialtri in campagna riuseine a sopravivar grazie ai campi. Lo Stato el te dava na tessera par comprar el magnar: par esempio 2 kg de farina par mese. Ala sera i soldati i pasava par le strade par controlar; non se podea dormir! Usaene tende nere o stoffe scure par no farse vedar parchè se i nemici i vedea qualcosa de ciaro i bombardaa. Pensaa che non ghel’avaresene mia fata e che seresene morti tuti. Me mari l’era nà in guera e quindi dovea ocuparme mi dei fioi e del resto. Quando le me butine le volea zugar ghe disea sempre: “Zughè nel rifugio così se gh’è un bombardamento, sì al sicuro!”. A Sanguineto ghèra el deposito de armi. Par no farse scoprir dai Tedeschi avene costruìo un rifugio soto tera. L’era de paia e de tera, de sora g’avene piantà dei albari. Me marì i l’avea ciamà par andar a combatar in Africa ma grazie a un general che l’era nostro parente el l’à fato restar a casa. L’è partio da Roma e l’è tornà a Boolon a piè par un bel toco de strada. El s’avea cavà la divisa da militar e messo dei vestiti normali par no farse riconosar dai Tedeschi. La sera pasava el PIPPO: n’aereo dal rumor assordante. L’era quel che ne bombardaa.

El 25 de aprile se trovaene nel rifugio e a un trato gh’è stà silenzio, ma semo restè li dentro fin ala matina dopo, finchè un omo le nà fora a guardar. I Tedeschi iera andè via. Semo né fora tuti quanti e de sora le nostre teste pasarono un zentenar de aerei, che i formaa na nuvola. I Americani i pasava par le strade lanciando caramele, ciocolata, zucaro…

 

Nonna Assunta - Elena

Quando l’è inizià la seconda guera mondiale gavea quindese ani e quando l’è finia ghe na vea vinti

Gavea tanta paura par i aerei che pasava sora la testa e i molava le bombe. Me ricordo poco; scapaene tuti nei rifugi e nel me paese (Malesina= Bonavicina)  ghera tanto teror e tanta confusion parchè tuti i volea scapar. Gavene fame, ma ghera poco da magnar, e bisognava averghe la tesera, ma i te dasea sempre poco.

Mi pensava che l’andese finia in presia parchè nela ritirata gavene americani in casa e i fasea tanta paura. Nela me fameia solo me papà l’è ndà in guera e pregaene tanto parchè el tornese e infatti l’è tornà.

Me ricordo che quando ndasene a laorar nei campi e sentene el rumor dei aerei,se scondene nei fosi anca se ghera l’aqua.

N’altra roba che me ricordo l’è che tute le sere pregaene tanto parchè la guera la finise e ghera sempre  un soldato tedesco con noialtre che el se inzenociava davanti al quadro dela Madonna e con le mani unite el pregeva tanto. Ala fine de la guera avoresene volù saver se l’era riusio a scapar, se l’era tornà a casa, ma non avemo savù più niente parchè non ghera mia comunicazioni.

 

Nonno Guerrino - Valeria

Quando i mà ciamà par andar en guera g’avea disnov’ani. Mi era contento parchè me parea d’essar come i me amici, inveze me papà e me mama iera preoccupè par mi. Ma iò tranqilizè e go dito che saria tornà e saria stà ben; anca se savea che non saria mia stà cosita.

Me ricordarò sempre quando i tedeschi i nà caturà .

G’avea apena ciapà sono e i canoni i ma sveià, iera i tedeschi!! El general lè venuo da noialtri e el nà dito de star chieti: le palotole le me pasava de sora la testa!! Senza far niuna resistenza semo né dai tedeschi e, visto che noialtri non g’aveine armi, semo né avanti senza fermarse.

El campanil sonava le dò e mi compiva disnov’ani. Lo “zio Adolf” el mà fato un bel regal: el mà portà al campo de concentramento en vacanza par vinti mesi; la vacanza piassè longa de la me vita!!

Nà olta g’aveine piassè fame del solito parchè erine senza magnar da du giorni. Mi, Carlo e Franco staine pensando che, almanco nà olta, podeine averghe piassè da magnar. Alora Franco el sa recordà g’avea nà maia de lana; el la portà vizin al recinto in do stava i russi e emo fato cambio; noialtri ghemo dato la maia e lori i nà dato pan e patate chemo magnà volentieri e con gusto!!

 

Nonno Marcello - Vanessa

Quando l’è ‘scumizià la seconda guera mondial in Italia gavea sie ani e ondese quando l’è finia, visto che son del ‘34.

De chi ani là, gho solo bruti ricordi. Oltre a quel che ha dito me moier, me ricordo che, a Nadal, se dovea ospitar a casa uno o piassé tedeschi che i beea whisky come se el fuse acqua. Visto che anca mi sera de Ca’ Di Opi, me ricordo che ale scole ghera el comando tedesco e ghera tute imagini del Duce, che el saria Musolini, e de Hitler. Ghera anca i russi. I copava tute le bestie e i fasea canoni de legno nele campagne par far le finte ai tedeschi e ai aerei. La gente la vivea nela paura e nel teror de la guera.

Non se podea mia nar a laorar nei campi parché ghera el pericolo dei bombardamenti e se andaa a scondarse nei fosati e, de note, nei rifugi. Me ricordo che a 50 metri da casa mia, nel campo in parte al mio, era stà molà ondese o dodese bombe da un aparechio colpio.

La roba che mai me desmentegarò l’è stà na roba tremenda: mi, me fradei, me cusini e dei me amici, zugando, emo catà un bozolo d’oton, che el saria na bomba, e un me cusic el l’ha buta via. Corendo, l’esplosion de la bomba le stà cosita forte che a un me fradel ghe sa piantà na schegia nel’ocio, a n’altro nela parte basa dela gamba e a mi nela coscia. Son stà al’ospedal un mese e, in sto periodo, nel leto in parte al mio, ho visto morir n’omo par le fusilé.

 

Nonna Elodia - Vanessa

Quando è ‘scumizià la seconda guera mondial in Italia, gavea du ani e, quando l’è finia, ghe n’ avea sete parché son nata nel 1938.

De chi ani là, me ricordo che vivea con la me fameia a Ca’ Di Opi, ‘na frazion de Opean, in un gran casegiato con ‘na gran corte. L’era talmente granda che i piloti dei aerei il le gredea ‘na caserma e cusita i se sbasava con l’aereo e noi altri butini gaveino paura che i ne vegnese adoso. Me ricordarò anca che meteino stofe nere, asi de legno e carte de zucaro sule finestre parché, se no, ghera Pipo, ‘l picolo aparechio che ‘l molava le bombe, che se el vedea le luci dele candele, ‘l molava le bombe. Quanti bombardamenti che l’ha fato nel campo in parte al nostro! Dato che ghera tante bombe, iavea costruio dele buse nel teren, i rifugi, quacè con un ase e con del foiame, visto che le case non iera mia sicure par i bombardamenti. La gente la vivea col teror e la tanta paura  par i tedeschi. Proprio par questo ho ‘scumizià la scola a sete ani.

Esendo pasà tanti ani, non me ricordo cosa pensaa e cosa provaa.

Ie sté tante le robe che mai me desmentegarò, ma quel che piasè m’ha colpio le stà quando, ‘na sera, un tedesco el ma tolto in brazo e el pianzea parché el disea che el gavea anca lu ‘na butina picola come mi e el me dasea tanta ciocolata. I me ciamava “moretina” parché gavea i cavei neri e la carnagion scura. Me ricordarò anca de quando el 25 aprile 1945 se vedea i americani che i vegnea par liberarne e uno l’era ferio gravemente; cusita me papà le andà a tor un par de tochi de legno e ‘na straza e el ga dato i primi socorsi: poareto, l’ha perso tanto de chel sangue!!!

 

Nonno Bruno - Alessandro

Quando la Seconda Guera Mondiale lè scuminzià, gavea tredese ani, e quando lè finia, ghe n’avea disdoto.

Quando gh’era la guera, se traversava i campi par andar a Massa a S. Zoane. Mi gavea ‘na tessera par andarmene a tor da magnar. Quei che i gavea dai vinti ai quarant’ani i era tuti via militar. Dovea star sconto parchè in piaza gh’era i fascisti e, si i me ciapava, o i me portava ala “TOT”, che l’era un posto in doe i m’avaria fato scavar ‘na fossa anticaro, in modo che i cariarmati no i podese mia pasar; o nei campi de laoro in Germania. S’era stufo de star sconto nei campi senza poder andar in piazza, parchè non avendoghe mezi par spostarme, s’era sempre a piè e risciava de essar ciapà.

Me ricordo de “Pipo”, un picolo aereo bombardie; quando lo senteene, doveene smorzar tute le luci e metar di scuri fati de carta da zucaro ale finestre, parchè no i ne vedese. ‘Na olta, “Pipo” là bombardà la stazion e ‘na strada piena de cavai. Finio el bombardamento, semo ‘ndè a torse un toco de carne de caval e, con solo quelo, emo magnà ‘na stimana. ‘N’altra roba che me vien in mente lè quando i tedeschi ià rubà du cavai con un borocin, che ‘l saria ‘na picola timonela. Di partigiani, col mitra, ià spaentà i tedeschi e iè tornè a casa coi ducavai e col borocin!!

 

Nonna Elda - Martina

Quando è scominzià la guera gavea sedesani, e quando le finia ghe n’avea vinti. El paese l’era mezo distrutto, ghera buse dappartutto. In giro se patea la fame e, par maiar, ghe volea la tessera; me zia le calà de peso, me mama non la ne fasea mia vedar la so paura invece me papà l’era terorisà... Se vivea giorno e note con la paura!

Me ricordo che un giorno serene nei campi, a un certo ponto è arivà i caccia e i ha molà zo delle spece de bombe ma non le fasea mia ciaso: le pare foie! Noialtri semo colegà soto i pomari, come i n’avea dito de far; quando i ha tocà tera semo accorti che non iera mia bombe ma bidoni udi de benzina: emo tirà un sospiro de solievo!

 

Giuseppe - Amico di Giovanni

Son nato nel 1921, ho fato la guera mondiale che gavea disdot’ani. Ricordo che ghera tanta miseria e tanta paura. La me gente l’era spaentà parchè i ne portava via tuto, anca el magnar. Mi speraa che la guera la pasese en pressia e che i ne lasese en pace. Mi me ricordarò sempre quando s’era in del campo de concentramento e che par magnar gavea da catar su le scorze de le patate e dei pomi par tera.

 

Zia Natalia - Camilla

Durante la Seconda Guera Mondiale g’avea zinque ani. De quei ani me ricordo quando rivava i aerei, la gente che scapava nei rifugi ei bombardamenti. G’aveino tuti tanta paura dei tedeschi e anca tanta fame. Nà domenica, finchè serino in Ciesa, ia bombardà Bovolon; è saltà a ferovia e ia butà zo la casa del segretario e dentro ghe restà dei buteleti. Dopo sto bombardamento me papà el na portà mi e la me fameia sfolati in campagna a Ca’ di Opi. Me nona la g’avea la tratoria in do’ magnava sepre i tedeschi archè i g’avea el comando davanti a villa Gagliardi...

 

Nonno Giuseppe - Angie

Durante la seconda guerra mondiale g’avea tredese ani. In quegli ani ghera molta paura, de note non ghera mia la luce, ghera soltanto le lucerne a petrol. Tute le persone g’avea paura e le g’avea fame. Un aereo che venia ciamà Pierin el controlaa se ghera aerei tedeschi, pronti a bombardar el paese. Tuti g’avea dei refugi: buse profonde e longhe coerte con travi e tera. Finio de bombardar, le persone le corea nele so case; ghera le ferovie distrute.

 

Nonno Nino - Veronica

Quando ghera la seconda guera mondiale, ghavea sete ani. Me ricordo che gavea paura e che i pregava tuti. Mi pensava che dovea star con me mama e non molarla mai. Na’ olta mi e i mè amici ema catà nà bomba a man: la me sciopà in man, taiandome un ocio e du diei; i mà operà senza anestesia. Adeso ghò un ocio ciaro e uno scuro e da quel ciaro son orbo.

 

Nonna Graziella - Veronica

Quando è scominzia la seconda guera mondiale ghavea un ano; mi pregava e basta parchè finise chela maledeta e inutile guera. Non me ricordo mia tanto, so solo che ghavea paura e che continuaa a pregar. Nà roba la me restà in mente, nà olta i tedeschi ie vegnui a fregarne le biciclete ma mi e me mama non saveno mia el tedesco; alora me mama l’à ciamà me nono e lori i ghà punta a me mama el fusil sula fronte parchè i pensaa che l’avese dito calcosa de mal. Dopo è rivà i americani, i ghà tacà un sberlon ai tedeschi, i ma ito che son bela come el sol e i mà dato un pacheto de caramele.

 

Nonna Natalina - Elena

Mi, nela seconda guera mondiale, gavea sedese ani. De quei ani me ricordo che de note pasava sempre un aeroplano, Pipo, che el butava le bombe a ocio; el scuminziava dala stazion de Bovolone, fin ala Casela. Mi e la me fameia, savene fato un rifugio; quando sentene l’aereoplano, scapaene dentro a sto foseto udo e de sora ghe metene i canari. lo stato d’animo del me Paese l’era paura e tristeza. Sera tanto impauria parchè, de note, girava i tedeschi ma, par nostra fortuna, non i na mia batuo ala porta, parchè serane un grupo de tre done. Me mama e me fradel iera in un altro grupo. Un giorno ne rià una bomba in casa, par nostra fortuna non le mia scopià ma dala scosa, ne rivà i veri dele finestre sui leti.

 

Nonna Natalina - Elena

N’altra olta me mama la mavea dito: “Va a torme un secio de acqua, in fondo la via.” Finchè el secio el se empenea, vedo arivar du tedeschi, uno con na pistola in man; el continuava e parlar in tedesco però mi non lo capea mia, son scapà in casa de me sorela parchè la stasea più vizina de casa mia. I tedeschi, iè arivè in casa, i me zercava e i volea parlar con mi parchè ghe disese ci gavea biciclete, par scapar; mi go dito che non savea mia ci ghi gavea; uno dei du le entrà in un cortil dove ghe nera una, anca mal ridota, mi volea scapar in casa, ma che l’altro non el me lasava. Quando el so compagno le vegnuo fora, con la bici, el ma ringrazià a mi son corsa in casa.

 

Nonno Bruno - Alessandro

Durante la ritirata, i omini i dovea scondar le biciclete, i cavai, i musi, parchè se no i tedeschi i ghe portaa ia tuto. Le done, inveze, le gavea da scondar la dote in ‘na cassa de legno e da soterarla soto ‘na teza, che la saria ‘na baraca fata de canari, che i è i fusti dele panocie. Tuti i gavea paura de tuto e non se vedea l’ora che ‘sta “benedetta” guera la finise in presia!!

 

 

Zia Natalia - Camilla

Quando ghe sta la ritirata, me ricordo che un tedesco l’è vegnu dentro in casa con la rivoltela e l’è scapà con la bicicleta de me papà. Me ricordo anca che un soldà tedesco el me disea sempre che lu, in Germania, el g’avea na butina come mi e a Nadal el ma regalà na candelina...

 

 

Bisnonna Gina - Vittoria

El 25 de aprile se trovaene nel rifugio, ad un trato ghe fu silenzio ma semo restè lì dentro fin ala matina seguente, finghè un omo le nà fora a guardar. I tedeschi iera andè via. Semo nè fora tuti quanti e de sora ale nostre teste pasarono un zentenear de aerei, i formaa na nuvola. I gavea tuti na bandiera bianca: la guera l’era finia. I americani i pasava par le strade lanciando caramele, ciocolata, zucharo...

 

Nonno Giuseppe - Angie

G’avea muche nela stala con dei cavai e i tedeschi ià portà via tuto e anche le me biciclete. El 25 aprile del 1945 è rivà i Americani a liberar l’Italia. Tuti i era contenti. Me ricordo che na bomba l’era scopià visin a casa mia, tute le schege de metal le sa atacà ale case; na schegia la ma colpì a una gamba, ho dovuo operarme senza nestesia. Sta scena nn me la desmentegherò mai.