La vita la score anca ne l'acoa 

Marta Vaccari • San Givanni Lupatoto (VR)

 

I ghe disea la Giulia dai oci celesti... infati i iera do acoe marine chei oci… i parea robè a la Madonaopura meio ancora! Forsi, l’era proprio la Madona che la ghiea imprestè par sostegnerla, perché la savea che la Giulia al mondo la gavaria vu da tribolar… che la gavaria vu da soportar na vita piena de spinicristi.

Pora Giulia, infati, dopo n’infansia cressua in la goera, la sea maridà zoina e a chei tempi bisognàa far tanti fioi. Senò, che famea érela?

Ghera el Duce (Mussolini) a darghe soto, el volea brassi da s-ciopi, omeni da butar in le goere e alora le copie le gavea da produr fioi, senò l’era anca un tradir la Patria.

La miseria, però, no’ la goardàa in facia nissuni, - né Duce, né Patria - e la cressea pari a la gramegna nei campi con tute che le  boche da sfamar!

E ti Giulia te lo saei ben - te dovuo rangiarte tanto - parchè a un certo punto el Signor la volù to marì nel sò Paradiso, lassandote con sette fioi ancora zoeni e impenendo i to oci celesti de malinconia, che a giorni i parea de un celeste griso.

Te stasei in val… Giulia… no’ chela de montagna… anca in campagna esistea le val: iera campi imersi ne l’acoa e mesi stagnè, pieni de sginsale, de bissi, ma pur sempre co’ el so fascino.

De note la luna la vegnea a spearse de spesso; el silensio l’era grando in chei loghi, e i spazi iera imensi. Forsi lì, la se sentea regina piassè che no’ da che le altre parte, parchè de spei ghe n’era piassè de uno… la ghea da sbisarirse che la smorfiosa!

La to’ casa, Giulia, l’era sora la Pecana… un bel fosso grando in do l’acoa l’era ciara e se ghe vedea el fondo.

El parea un canton de Venessia chel logo lì, trapiantà al to paeseto de la bassa veronese, e no l’era mia da tuti erghe na casa sora l’acoa, anca se l’umidità no’ l’era el massimo del vivar.

Me ricordo de un giorno de luio, che s’era vegnua a catarte, e semo messe fora vissin ala Pecana.

“Giulia, gheto mia paura a star qua?” un bel colpo gh’ò dimandà.  “A olte i ma dito che sto fosso el se ingrossa!” gh’ò zontà par saerghene piassè.

“Ti lo seto che la vita la s-core anca ne l’acoa? Guarda lì che bei barbi lustri che ghe, e che bele trote… arda ‘desso se na pena sconta una, la  va a sponsarse dedrio a l’erba del fosso, te vedarè che a pian la sbusa fora e la riparte, tante olte guardo sta smaravea… te ghe da saer che la Pecana la traersa tuta la campagna, la ven da distante, e spesso la cambia anca de osse… no’ la gh’a mia sempre che la osse la Pecana, forsi la se porta adrio tuti i umori dei laoradori dei campi. Son convinta che la scolta tuto, che la se tol su tuto, e par chesto la osse de l’acoa la cambia… proprio a conforme de i umori de i omeni…par mi l’è na radio verta la Pecana!” la ma risposto tutto de un fià la Giulia orgoliosa del so’ pensier.

Mi s’era incantà nel sentir ste robe, no gh’o vù coraio de dirghe che forsi la laoràa de fantasia - no me lo proprio sentia! -  anca parchè in chei minuti lì i so oci iera deventè sempre pì celesti e la so malinconia l’era scapà de un boto. 

La Giulia, l’era anca na dona forte, no’ la mea mai contà de le so paure - chele la se ie tegnea par ela - de quando i temporai i ingrossàa la Pecana e le acoe color del torbio le scapàa dai argini par sgrafarghe la porta de casa che la dindonàa come na campana mata… s-ciafà anca da un vento maledeto! Na olta sola la mea dito na meza (ghe lo cavà fora co la forsa)  che l’era umano che in chei minuti lì la ghesse paura… ma che ela la pregàa tanto e la se tacàa ala pertega dela speransa e pian el Signor el le scoltàa fasendo sorar la rabia del temporàl e del vento.

Pora Giulia… no ghe domandàa pì gnente quan nasea a catarla, la lassàa co la convinsion che la vita la s-corea anca ne l’acoa, e che l’acoa la cambiàa de osse a seconda dei umori de i omeni. Soto un certo aspeto la gavea reson… lo riconosso, l’acoa la gh’à grandi significati: vegnemo anca da l’acoa! E la Giulia l’era anca na dona meditativa, no la se sbagliàa de çerto…