El tredesì

Nestor Josè Foresti • Brasile

Lo savé che, naolta, no ghe zera la television, gnanca el computer. Ma no vol dir che i nostri antenati i fusse meno inteligenti e no i ghesse anca lori le so diversion. I ghea le so maniere de passar ore contenti insieme, par ciacolar, contar storiete ai tosatei, sia nele note d’inverno, sia nei giorni de apiova. Le so stòrie le portea bele lession de vita, parché e vegnea fora dea boca con la forsa del cor e del amore, e nò de na cassa freda e anònima come el computer e la te levision. Ve ricordo una de queste stòrie, che me nona, fi ola de imigranti vegnesti dal Itàlia, pi de cento ani indrio, la se godea de contarme, intanto che le so man strache e svelte le menea le paie par far la dressa. Ve invito a sentarve zo con mi e me fradei del soaio de legno dea nostra vècia casa, intorno el fogolaro, e scoltar la stòria che la nona, con vose tremante, del età e de emossion, la contea.

Ghe zera na fameia tanto, tanto poareta. In tuti i zera quìndese: Pare, mare e trèdese fradei. El ùltimo zera el pi furbo de tuti e i lo ciamea Tredesì. La carestia zera granda e pare e mare no i savea pi cosa far par darghe de magnar a tanta gente. Na sera, in leto, i ga combinà che, par no veder i fi oi morir de fame, saria meio che so pare i menesse in meso la foresta, e i assasse lì persi. El Signor e i so àngeli i ghe cataria fora na maniera de salvarli dela fame. El Tredesì, però, gran furbo, el ga scoltà quel che i ga combinà, e el se ga prevenio con le scarsele piene de sémole.

Dopo magnar qualcosa, un bel di, i parte, tuti in fi la, drio so pare, sensa saver ndoe che i ndea. El Tredesì zera el ùltimo e, ogni poco, el molea do un poche de sémole par marcar la strada. Quando i era in medo la foresta pi alta, so pare el ghe dise che ‘l ghea de far i so bisogni e li ga assadi soli e no l’è pi tornà. Quando i se ga nicorti che i era persi, tuti i scumìssia a piander, meno el Tredesì, che zera el pi dóveno. El ghe dise ai so fradei: "Vegnè drio mi che ve meno casa!"

E così, col Tredesì davanti e dadrio el segno dele sémole, poche ore dopo, tuti i era a casa de novo. Quasi che i rivea prima de so pare. Tuti i era contenti de esser a casa, però la fame la continuea e dopo qualche di so pare, li invita ancora a ndar in giro. Prima de partir, sta olta so mare la ghe dà un tocheto de pan cada un. El Tredesì, sospetoso, in vesse de magnarlo, lo ga messo in scarsela, e ogni poco el molea do un poche de frégole par la strada. Sol che sta olta ghe zera anca el cagneto che ‘l ghea fame e quando el ga visto quei tocheti de pan el se ga messo in strada anca lu. Quando tuti disperai i se cata persi de novo, el Tredesì li chieta. E el ghe dise: "Son restà sensa magnar, ma l’è sol ndarghe drio ale frégole de pan che go molà pa strada che rivaremo casa de novo!"

Pochi passi dopo, però, i se incontra col so cagneto che, tuto contento, el ghe mena la coa con la panseta piena. Adeso si anca el Tredesì el se dispera. I serca de indovinar la strada, ma, pi che i camina, pi la foresta la deventa alta e serada e, pedo ancora, scumìssia a scurir. Tuti i piande e i scumìsia a osar e ciamar so pare. Ma i sentea solo i rumori de osei e bèstie dea foresta. La paura i fa osar e piander sempre pi forte. Ma el Tredesì, invese de piander e disperarse, el pensa cosa far. Romai ze scuro e no ghe ze né luna, né stele par far un poco de ciaro. Meio così, pensa el Tredesì – e el scumìssia a ndar su par la pianta pi alta che ‘l cata. I altri, in tera, disperai, e el Tredesì picà su pai rami dela pianta. Quanta paura!

El Tredesì el rampega su pai rami e, quando l’è tel ramo pi alto, el osa ai so fradei: "Semo salvi!" "Ma come, semo salvi?" I ghe domanda. "Mi vedo un ciareto ben distante, ma lo vedo ben. Invense de piander e osar, ghemo de caminar, parché quando rivarà el di, no se vedarà pi el ciareto." E così, tuti drio al Tredesì, i caminea na ora, du ore... e dopo el Tredesì el se rampeghea su par na pianta, e sempre el ciareto restea pi groso e pi darente.

Dopo caminar ore e ore, i riva darente na casa sola in meso la foresta. I scioca le man e un omo, un poco strano e spaentà, el verde na finestra. El omo el se spaenta depì ancora quando el vede tuti quei tosatei a quele ore de note e el capisse suito che i era persi. El Tredesì el se fa coraio e el ghe domanda: "Signore! Semo persi ancora de ieri in meso sta foresta. Scusé disturbar a ste ore! Volemo sol che me iutè a catar la strada par tornar a casa nostra!"

El omo el sera la finestra e el desmissia so dona: "Salta su che ghemo visite!" La dona la se alsa e la se spaenta anca ela al veder quela trupa de tosatei mal messi e strachi.Anca se no li cognossea, li ciama rento e li fa lavarse, la bina su qualche tocheto de pan e quel che i ghea vansà dela sena e la serca de sfamarli un poco.

Quel che i nostri pori tosatei i se imagina mia, nela so inocensa, l’è che i era pròprio in tela casa dele persone pi pericolose de quei posti: i era rivai pròprio nela casa del mago. El Mago e so dona, però, i fa finta de gnente e i li riceve ben. Dopo averli sfamati un poco i ghe ofre anca la possibilità de dormir. El Tredesì el varda a torno, quando la dona i mena rento un quarto ndoe ghera altri 13 tosatei che dormia con na bela bareta cada un in testa, e la dona la ghe dise: "Ve metemo qua a dormir con le nostre trèdese tosete, parché sé stufi, e doman ve insegnaremo la strada par tornar a casa vostra."

El Tredesì però el ga catà quel posto meso strànio e no l’è stà bon dormir. El sente che in tel so quarto el Mago el parla con so dona. I so fradei i se ghea belche indormensai, ma lu el serca de capir quel che i due i dise e el resta coi cavei in pié quando el sente el omo che ‘l ghe dise a so dona: "Doman matina, leva su presto e inpia el fogo soto el pignaton, parché ghe taiemo la testa a quei tosatei e i metemo a cusinar!"

El Tredesì el pensa cosa el podaria far, el speta che tuti i ciape el sono, el se alsa su pian, el ciapa le barete che le tosete le ghea in testa, e le mete su la testa dei so fradei. El mago el vien, ancora scuro, e el scumissia far el bruto laoro de taiar via la testa a quei che i era sensa bareta. Tuti i dorme, ma el Tredesì el fa sol fi nta. Quando el mago el fi nisse el so laoro, col aiuto de so dona, i mete tuto in tel pignaton, e i scumissia a smissiar. El Tredesì, alora, el svèglia i so fradei ben pian parché no i senta gnente, i scapa via par la foresta de novo. Adesso l’è quasi di, ghè sol na stradeta e no ghè pi come pèrderse. I riva a na picola cità. I domanda informassion e, prima de sera, i ze belche a casa de novo. I trova so pare e so mare che i piande, parché, i era pentidi de quel che i ghea fato coi so fi oleti. EI Tredesì, alora, el ghe dise: "No stè mia piander! Semo tuti qua! Savemo el parchè me ghè molà in te la foresta: Par no véderme morir de fame! El Signor, el ga man dà i so àngeli che i me ga dato de magnar, de dormir, iutà a scampar dele man del Mago, e el me ga fi n portà a casa, tuti sani, nantra olta!" I so genitori, alora, i ga abrassai, tuti contenti, e i ghe promete che mai pi i mandaria via.

"Ze meio morir de fame tuti insieme, che viver sensa i nostri cari fi oleti!" I ghe dise.

Me ricordo che, ogni tanto, se vedea qualche làgrima tei oci dea nona, sopratuto quando la parlea de fame, de carestia, e dea fameia. A quei tempi, mi no savea el parché, ma oncó, quando vardo indrio, e vedo quel che i ga patio e fato i nostri imigranti, no sò ben el parché, ma anca a mi me vien le làgrime ai oci.