Fabro Volpi

Julio Posenato • Brasile

Co mi gaveva sete ani, me piaseva scuriosar là ntela feraria del Volpi.

La feraria l’era un spetàcolo: tochi de fero i deventava sape, ronconi, e tante robe de gnanca creder; in ogni smartelada del brasso forte del Volpi, l’ancùdine sonava cofà el boto de na campana; me feva gusto parar la màntesa; me imagava le falive a saltar, come se le volesse scampar del fogo par no brusarse fora; me meraveiava veder el fero - che mi credeva la roba pi dura che ghe fusse ntel mondo - deventar rosso e tendro su’l fogo.

La prima volta che go visto ferar cavai, son tornà suito casa coi oci grossi, a contarghe ala mama: "Seto, mama, che ‘l Volpi l’è un màgico? Lu’l incioda le feradure ntei cavai e lori, pacìfichi, gnanca i bada!"

"Ma va là, maginàrsela! Le zampe le ze, par i ca vai, come le óngie par noantri" me ga insegnà la mama. "No le taiemo fora co le deventa longhe? Se ferar i cavai ghe fesse mal, i molaria peade, sicuro!"

Desso me incordo che là ntela feraia mi disturbava. Cola voia de veder tuto, mi meteva el naso tra l’ancùdine e el martel. Un perìcolo de scotar me e farme mal. Qualunque altro me faria corer: "Tìrete fora, pistolin! Qua no l’è mia posto par tosatei!"

Ma el Volpi no’l me parava via. Ghe piaseva sen tir el me gusto de star là ala so feraria. Lu el me racomandava par ténderme, e me guardava tanto depì.

El me feva vardar come la témpera slissolava ntela lama, se lo vedeva par el cambiamento del color. Ntel tempo giusto el impiantava la lama ntel’aqua, che feva una nùvala de vapor e bruti fi s-ci. El me diseva che la témpera sol la deventa veramente bona ntei giorni sensa vento e pieni de sol. Quando ocoreva una témpera de na pi bona qualità, ntel posto de l’aqua el Volpi el doperava seo. E par finir el laoro, el impiantava la lama ntela tera o ntele sènere.

Dele volte, el Volpi el feva in tera un tòndolo de fogo de carbon de gropi de pin, butava dosso un sércio de fero e, co l’era rosso, lo impiantava cole tanaie nte una roda de careta; el impirava suito un fero tondo ntel buso del asso e, con l’agiuto de qualchedun, portava la roda sora una vascheta de aqua che la gaveva par banda una stanga con cavici aposti. El feva la roda girar svelta e posava el fero pinpian ntei cavici par via che el sèrcio el se sfredasse ntela aqua, la roda sempre girando. Ma quante fis-ciade mate e quanto vapor! Mi no me ricordo mai de aver vedesto una roba compagna! Ma si, la mama l’era sbaliada: Volpi gavaria pròprio de esser mágico! (Anca par via che mi no zera mia bon de capir come lu el saldava fero sol cola sàbia, parché, nte serti laori, lu el doperava el zolfo, na roba con odor forte e misterioso.)

Contento cola me alegria, Volpi el me insegnava le tèniche del so laoro de ferer: "El fogo ‘l scalda e sgranda ‘l fero; ghe vol pareciar el sèrcio col diàmetro pi curto dela roda tanto quanto el so pròpio spessor, de na maniera che la roda sol che vaga rento co l’è scotente; l’aqua lo sfreda e lo scurta indrio, cossita ‘l sèrcio strenze la roda e la tien salda. Se ti te vedi ben, i rai no i ze impiantadi driti ntela testiera dela roda, ma na s-cianta de sbiego, par via che la roda la reste sempre soto pression, e le gambote le ze tute imas-ciade, ma varda qua che tra due l’marangon l’assa na sfesa. Cossita, ‘l sèrcio no ‘l se mola mai, no’l vien mai fiapo, anca se i legni dela roda i se cala."

Fabro Volpi, ti te si stà

na parte del me mondo felisse.

Passadi belche cinquanta ani, la feraria no ghe ze pi. Deromai vansa solche poche dele tantìssime vècie ferarie: I zòvani no i vol mia sto mistier, no se dòpera pi le caretine e tante robe le ze cambiade. Ma mi no me go mai desmentegà el boto del’ancùdine, le falive, el fero rosso, la témpera, i serci, el saldar cola sàbia, el zolfo, i feri de caval. E me ricordo anca dei oci del Volpi, sempre rossi de star darente el fogo; e, co lu tornava casa ala sera, la spussa de fumo che el se portava torno e el so viso straco.

Fabro Volpi

Coi oci rossi

el viso straco

e la spussa de fumo

Poro Volpi

Del brasso forte e del cor dolse

Ti te si stà

Na parte del me mondo felisse.